Kanariar Uharteetako nazionalismoaren inguruko erreportajea argitaratuko du bihar BERRIAk, eta horren baitan Antonio Cubillo buruzagi independentista historikoari egindako elkarrizketa, 1978an Espainiako zerbitzu sekretuak egin zion atentatuaz. Gaitik kanpo, Cubillok kontatu du Julen Madariaga ETAko buruzagi ohi historikoarekin harreman ona duela Aljerian erbesteratuta egon ziren garaitik. ”ETAk eduki zuen lehen autoa erosi nion Madariagari Aljerren 1965ean. Guardia zibilak emandako lau tiroak zituen oraindik”. Cubillok soldaduska Garellanon egin zuen, Bizkaian, eta Euskal Herriaz ”sekulako oroitzapenak” dituela dio.